Miqtë e Sinqertë dhe të Pasinqertë: Dallim i madh që Ndikon në Jetën Tonë

04.06.2025

Në rrugëtimin tonë jetësor, mbështetja emocionale, mendimi i drejtë dhe këshilla e mirë janë të paçmueshme. Këto shpesh i marrim nga ata që i quajmë miq. Por, jo çdo miqësi është njësoj. Ekziston një dallim i thellë mes miqve të sinqertë dhe atyre të pasinqertë – një dallim që nuk është gjithmonë i dukshëm në sipërfaqe, por që ka ndikim të madh në zhvillimin dhe mirëqenien tonë personale.

Miqtë e sinqertë janë ata që të qëndrojnë afër pa kushte. Ata të lavdërojnë kur e meriton dhe të kritikojnë kur është e nevojshme, por gjithmonë me qëllim të mirë – për të të ndihmuar, për të të përmirësuar, për të të ruajtur nga rruga e gabuar. Lavdërimi i tyre është i pastër, i bazuar në vlerat reale që i shfaq një person. Kritika e tyre është konstruktive, ndihmon në identifikimin e dobësive dhe në organizimin më të mirë të jetës.

Përkundrazi, miqtë e pasinqertë janë shpesh të pranishëm për interesa personale. Ata mund të përdorin fjalë të bukura, lavdërime të shumta, komente të ëmbla, por prapa këtyre qëndrojnë qëllime të tjera: përfitime materiale, favore për ndonjë vend pune, ndikim apo afirmim publik. Në rastin më të keq, ata kritikojnë jo për të ndihmuar, por për të ulur vetëvlerësimin tënd ose për të shfrytëzuar dobësitë e tua.

Është e rëndësishme të kuptojmë se miqtë e sinqertë nuk janë të shumtë. Madje, shpesh janë të rrallë. Por prania e tyre është një dhuratë e rrallë në jetë. Ata nuk janë miqtë e leverdive, as të interesave të përkohshme. Janë njerëzit që e duan të mirën tënde, edhe kur kjo do të thotë të të thonë diçka që nuk dëshiron ta dëgjosh.

Nga ana tjetër, lavdërimi dhe kritika e pasinqertë mund të jenë po aq të dëmshme. Të lavdërosh pa meritë e krijon një realitet të rremë. Të kritikosh pa dashuri, e rrënon vetëbesimin. Andaj, është mençuri të tregojmë kujdes e vëmendje ndaj qëllimeve që fshihen pas fjalëve të të tjerëve. Jo çdo fjalë e ëmbël është dashamirësi, dhe jo çdo kritikë është urrejtje.

Le të kultivojmë miqësitë e sinqerta. Le të jemi vetë të sinqertë. Sepse vetëm përmes sinqeritetit, krijojmë marrëdhënie që na rrisin, na forcojnë dhe na bëjnë më të mirë – si njerëz dhe si shoqëri.

I juaj, mësuesi Isë